قلب الحيـــــــــــــاة مليــان حواديت وبتفــــــــــــــــــــــــــــرح ♥ ~


الخميس، 8 ديسمبر 2011

ضـــــــــوء..~




تلد فاللغة الايطالية تعني ان تخرج للضوء
لا ادري حقا اي ضوء يتحدثون عنه
ربما يقصدون تلك الاضواء الصغيره المفعمة بروح الطفوله

ـــــــــــــــــــــــــــــــــــــ

ولكنهم لا يدركون انها سرعان مستخبو
ليطل علينا الواقع
بظلال احداثه الخافتة...


______________

احيانا يطل علينا الضوء مرة اخري
متنكرا في لحظات خفية مفرحة
تحمل بين طياتها رساله من القدر
"فقط..كن بخير...ما زال هناك أمل" !

ولكنه لا يستمر طويلا كعادته
وكذلك الامل !
ــــــــــــــــــــــــــــــــــ

وتستمر حياتنا علي هذا الدرب
اضواء تأتي وتخبو
قلوب تحيا وتموت
افراح بنكهة الحزن


انا لا أتذمر
فقط اشتهي ضوء حقيقي..~



الجمعة، 18 نوفمبر 2011

احلم وانت مصـــــدق ~♥




حد فاكر الكلمه دي؟
تقريبا من اكتر الكلمات اللي بنسمعها من واحنا صغيرين
اول سؤال بنتسأله فالدنيا لما اللي حواليك
يحسو ان المفعوص اللي ادامهم بدأ يكبر
بتحلم بايه يا حبيبي؟!
في مننا اللي كان بيحلم يبقي دكتور "وربنا يتولاه لو كان حقق الحلم ده:)"
وفي اللي كان بيحلم يبقي مهندس
وفي الطيار والرسام والمدرس
وكل الاحلام دي اللي كانت ببلاش ايامها



 



المهم اننا كأطفال كنا مقضينها احلام في احلام
كنا بنحلم عشان نعيش اللحظه
حتي لو مش عارفين هنحقق الحلم ده ازاي
حتي لو مش واثقين احنا قد الحلم ده اصلا ولا لا

ولما كبرنا شويه وفهمنا معني المقوله اللي بتقول
"ليس كل ما يتمناه المرأ يدركه"
وتقريبا بقت الشعار الرسمي لكل الاحلام المتعلقه علي شماعه الزمن
عالم الاحلام بقي بالنسبه لنا مش اكتر من عالم خيالي
مكتوب عليه يافطة بالخط العريض للاطفال فقط


 


قليل قوي لما تلاقي حد وسطنا لسه بيحلم
مش شرط سافر لفين بحلمه
بس علي الاقل لسه جواه لحن بيدندن
 


احــلـم مـعـايا 
ببكره جاى
و لو ماجـاش
احنا نجيبه بنفسنا
نبدأ نحاول فى الطريق
كتر الخطاوى تدلنا على حلمنا
مهما نقع نقدر نقوم
نشق نتحدى الغيوم
نلاقى ليلنا ألف يوم
بس احنا نحلم


مش عارفة ليه اول منجيب سيرة الاحلام
بنفتكر علي طول كل الاحلام المأساوية اللي محققنهاش
ونعيش لحظات النكد الازلي بقي
وكأن الحلم بقي سيرة للعكننه
طب ليه منحاولش نفتكر برضه اي حلم صغنون علي جنب حققناه ونفرح بيه
وممكن نفتكر برضه اي حلم اي حد حققه ونفرح بيه
وندي لنفسنا امل ان ممكن في يوم من الايام
نصحي الصبح علي واقع كان مره مجرد حلم بيترسم

م الآخر
احْلم وانتَ مِصَدّق
احلم وعيش الحلم بكل تفاصيله
احلم وانت حاسس ان الحلم ده حته منك
هتشوفه وتلمسه في يوم من الأيام

 





احلم وطيــــــــــــــر مع احلامك لأبعد سما ~



SoHa EmAd

~تفاصيــــــل صغيرة ~



في حياة كل واحد فينا تفاصيل صُغيرة
غالبا بتبقي تفاصيل بسيطه بس دايما بتبقي عميقة
عشان بتضرب علي الوتر الحساس جوانا وتدينا معني للحياة


في تفاصيل فيها احساس طفولتنا بشقاوتها وبراءتها
زي الدبدوب اللي مكنتش بتروح في حتة من غيره وانت صغير
حضر معاك كل تنطيطه فرح وكل شهقة بكا
وغالبا هيبقي دبدوب منكوش مليان جروح واصابات( تأثير الزمن بقي)^_^
بس عندك بميت لعبة من اجدعها محل اطفال





وفي تفاصيل تانيه فيها احلام امبارح
زي ورقة مسطره في نوته صغيره
كتبتنا فيها مره بنحلم بايه لما نكبر
مننا اللي رسم بخياله بيت وعيلة
واللي رسم فيلا وعربيه
واللي طار بطيارة فوق فالسما
كان لكل واحد فينا عالم خاص من الاحلام
منها اللي اتحقق ومنها اللي لا
ومنها اللي لسه يامسهل بنشد السفر ليه
بس م الآخر كل حلم حلمنا
كل خيال سارح سافرنا معاه
ليه جوانا تفصيلة




وفي تفاصيل بتفكرنا بحاجه حوه
بتخلينا نضحك كل ما نفتكرها
وتفاصيل تانيه بتجيب معاها نكد الدنيا
عشان فكرتنا بحاجه مضايقانا

كل تفصيلة صغيره من دول شايلة معاها حتة مننا
حتة فيها ريحة امبارح
فيها امل بكره

تخيل ان حياتك علي بعضها عباره عن تفاصيل صغيره جوه تفاصيل كبيره
تفاصيل انت بطلها
تفاصيل هتفكرك بكره بيك النهارده

تخيل ان انت نفسك تفصيله قد كده فدنيا قـــــــــــــــــــــــــــــد كده



خلي عالمك دايما مليان تفاصيل فرحانه
ممكن لما تفتكرها بعد كده ترسم جواك ضحكه انت بتدور عليها ~



SoHa EmAD

الخميس، 17 نوفمبر 2011

الأربعاء، 16 نوفمبر 2011

دَقة كده وكده...!

 
 
عارف احساس انك مش واخد بالك من اي حاجه

يعني ممكن تبقي مش واخد بالك انك زعلان اصلا

تعود نفسك علي كده

ومع كل الدوشه اللي حواليك

تفضل تقول لنفسك طول منت ماشي فالدنيا

... انا مش هفكر في حاجه تاني

مش عارف انت بتسمّع نفسك ولا بتسمّع اللي حواليك ولا بتسمّع الدوشه !

ده انت ممكن برضه تبقي مش واخد بالك انك فرحان

غير مثلا لما حد يقولك ان دي حاجه حلوه المفروض تفرحك

تطلع بقي ساعتها الوش المبسوط وتضحك الضحكة اياها

قال يعني هتفرق:D

قرأت مره جمله..لا يوجد اصعب من الحزن سوي غياب الحزن

تفتكر ليه؟!

عشان ساعتها كل حاجه بتبقي شبه غيرها

ببساطه كده الحياة مهما كانت ملونه بتبقي باهته

لا الاحمر بكل طاقة الحب اللي جواه بيبقي احمر

ولا الابيض بكل النور والنقاء والطيابه اللي فيه بيبقي ابيض

حتي الاسود بكل الكآبه والضلمه مش بيبقي اسود

كل الالوان دي بتبقي م الاخر رمادي!

وشوف انت بقي لما تبقي الحياة رمادي

الفرحه رمادي

والزعل رمادي

الصبح رمادي وبليل برضه رمادي

علي رأي عم علي سلامة

مابقتش شايف ايه اللي جاي وايه اللي فات

مابقتش افرق

ده ازرق ده ولا احمر رمادي

ودي كارثة ولا ده وضع عادي

وده احنا ولا الكل حاير


دي خلاصة الحدوته

الالوان كلها هتتنطط فالدنيا بتاعتها

وانا والرمادي بتاعي هنتنطط برضه بس فدنيا لوحدنا

دنيا من غير حزن

من غير فرح

من غير الوان

قوس قزح !


بس اطمن في وسط كل ده

فيه لسه حته كده مألونه

الحته دي هي قلبك

بس الالوان دي مش بتاعتك

دي بتاعة اللي حواليك واللي بتحبهم

لما يفرحو هتحس بالفرح معاهم

ولما يزعلو هتحس بالحزن عشانهم

يعني قلبك لسه برضه هيعرف يدق

بس دقه كده وكده ..!


_______________________________



~S~

أنا وأنتِ♥

كنتِ انتِ وكنت أنا
 
كنتِ لحنا وكنتُ كلمة
 
كنتِ طيفا كنتِ حلما
 
كنتِ املا للاخاء
 
وكنتُ طفلة تبحث عنك
 
... بين جموع الاصدقاء
 
كنتِ وكنتِ والآن صرتِ
 
صرتِ توأم حُلمِ
 
صرتِ منبع أملِ
 
صرتِ معزوفة اشتياقِ
 
صرت قدراً
 
لانكِ انتِ ولانني انا

ورقة فاضية وقلم..♥

ورقة فاضيه وقلم

جوانا الكلام جوانا الاحساس
 
جوانا طفل بقي محتاس
 
جوانا اسئله كتير من غير اجوبه
 
... بندور علي الحل حوالينا
 
ونتوه مننا كده فبعضينا
 
ونرجع نلف من تاني
 
علي حلم بسيط مش اناني
 
علي ضحكه طفل جوانا
 
نسي معني الابتسامه
 
علي فجر يصحينا
 
علي امل كان اجمل حاجه فينا
 
ورقة فاضيه وقلم
 
مش مجرد اقتراح دي دعوة للحلم.... للبراح
 
لنشيد انت لحنه لصاحب انت ضله
 
لبسمة جواك تطلع تملي الدنيا سعاده
 
لألوان ترسم بيها وشوش من كل حته
 
تضحك تفرح تزعل تعيط تدوس فــ أي سكه


Soha Emad